هدنه مطلوبه

هدنه مطلوبة

نزلت اول امبارح مع صديق ليا اتشميت معاه و حسيت انى محتاج اتكلم ومحتاج اقول عن حاجات كتير مش عجبانى اشوف انا الصح ولا الغلط

نزلت واتكلمت لغاية لما تعبت من كتر الكلام وكنت ناوى قبل ما اتكلم واخرج معاه انى اروح على طول بعد ما كلامى يخلص

لقيت لما تعبت من كتر الكلام حسيت انى محتاج امشى شويه .... وليه لا ما انا بئالى كتير اوى متمشتش بلا هدف (يعنى مش خارج رايح مشوار او بجيب حاجه بمشى للهدف ده)

وبالفعل مشيت يجى اكتر من ساعه ماشى

وبالترتيب :

تقابل ناس كتيرة مختلفة فى الشكل والحجم

تقابل محل ورد ريحه الورد منه جميله (زمان كنت بشترى ورد وزرع ليه دلوقتى مبئتش اعمل كده)

تقابل ناس بتتخانق

تقابل ميت

تقابل فرح مش بعيد عن الميت ده على بعد 100 متر بالكتير اوى

تقابل عربيه غالية جدا وفيها ناس مشغله اغانى وفرحانه

ووراها ناس راكبه على عربية بحصان برده بيضحكوا ومبسوطين

..... الخ الخ من معانى وصور موجوده بالفعل وانت عارفها الحلو منها والوحش

كل الصور ديه حركت ذهنى لحاجات كتير وقيم ومعانى اكتر وكل معنى عندك وقت تفكر فيه بحريه وتتامل فى كل صوره وتاخد منها معلومة او عبره او فكره

ومن التفكيرفى كل صوره وتلخيصها لمعنى بسيط محستش بالوقت ولقيت نفسى قرب البيت

وقبل ما اخش على البيت حسيت انى اتغسلت من حاجات كتير ... غسيل ذهنى قبل ما يكون غسيل قلبى ... وحسيت انى بستحمى بصورة غير مباشرة (جديده وحلوه)

ودخلت البيت خد دوش ظريف والصور بترجع فى ذهنى سريعا بالراجع لاول الحكايه واول خطوه مشيتها

وخرجت صليت ودخلت نمت خفيف بدون اكل

من الجميل انك تلاقى وقت للتامل ... التفكير فيما خلق الله ... من الجميل انك تخرج من الساقية الى انت ماشى فيها كل يوم من البيت للشغل والعكس او حتى خروجات بئت مكرره وممله

ياريت ولو مره كل شهر تدى نفسك فرصه للخروج والتامل بلا هدف

وهنا افتكرت تامر عادل لما قالح ياريت نلعب كوره ولو مره فى الشهر

وانا بقولكم ياريت لو تتامل مره واحده فى الشهر وتخرج تمشى بلا هدف مسبق

وشكرا