مطلعش العيب من السواق

التاريخ : 13/7/2013

المكان : موقف العاشر (ميكروباص العاشر من رمضان)

اسمع يا سيدى

اتخرت على الشغل اليوم ده ومتعرفش ليه يا اخى مبكتبش عن احوال البلد الا لما بتاخر وبالذات لما اركب الميكروباص

ممكن عشان بشوف ناس مختلفة وثقافات مختلفة

ممكن عشان بحتك بالواقع وبخرج من السجن بتاع اتوبيس الشغل ثم قاعدت النت بليل

متعرفش بس الظاهر ان احتكاك الانسان بالواقع شى مهم بتعرف منه الاحداث وكمان عنيك بتقع على حاجات تقدر تحس بيها بلدك وده طبعا نداء لكل مسئول انه ينزل ويحتك بمشاكل الشعب عشان يقدر يحلها ده لو عاوز اصلا يحلها

المهم

ركبت ميكروباص العاشر من رمضان ولقيت السواق بيقول الناس يا جماعه الاجرة 4 جنيه

يا عم ليه حرام عليكم الاستغلاال ده طول عمرها ب 3 جنيه ليه تزودوها ل 4 جنيه

يرد السواق يقول حجج فاضية وملهاش اى اساس من الصحة (اصلى بنزل مش بحمل تانى – اصل المشوار متعب وكبير)

وبعد محايلة من الناس والراجل برده مصر والناس بتدعى وتحسبن عليه

قال خلاص لو عاوزيين 3 جنيه يبئا طريقى هو طريق الموقف مش المصانع عشان اروح احمل من الموقف هناك

وهنا الناس مرضيتش ونزلت من الميكروباص ... وشوية صغير فاضليين ميفرقش معاه الطريق لانهم ينزلوا قبل كده وانا منهم

المهم الراجل قال خلاص 3 جنيه لغاية الموقف وده السعر المتعارف عليه

والظاهر كده ان السواق ده بئاله كتير نزلش الموقف ولا بيحمل كتير الا للظروف الطارقة

المهم الراجل راح يقطع الكارته لقاها غليت !!!!!

استغرب وقاله ليه ياعم الكارته غليت

ورجع تانى لينا وقلنا يا جماعه معلش هترضوا يبئا ب 3 ونص اصل الكارته غليت قبل ما اقطع الكارته

انا عارف انى اتفقت على 3 جنيه بس والله معرفش موضوع ان الكارته غليت ديه

وهنا زعق الراجل بتاع الكارته الى فى الموقع وقال

كل الموجوديين فى الموقف العربية ب 3 ونص الاسعار كلها رفعت ... مفيش عربية تروح العاشر اقل من 3 ونص !!!!!

طبعا الناس شتمت وقالت حسبى الله ونعم الوكيل هيا مش ازمة البنزيين خلصت !! انتم ليه بتستغلوا الناس ورفعتوا الاجرة مش عاوزيين  تنزلوها ؟

نسيت اقولكم ان الموقف نفسه ما صدق ولئا ازمة فراح السواقيين رافعيين السعر فراح الموقف كمان معلى الكارته واقبوا اقبلونى لو نزلها تانى وكل ده يعود بالراجع على المواطن العبيط الى هيدفع برده الزياده

العيب مكنش بس من سواقيين الميكروباص ده كمان من بتوع الموقف الى كلهم استغلوا الظروف ورفعوا اسعارهم بدون اى رقابة من احد

فين الحساب والراقبة .... لكى الله يا بلدى

اكيد لازم تتشال من عجائب الدنيا السبع

اكيد لازم تتشال من عجائب الدنيا السبع
ايوه هيا الاهرامات
فكرت انى اروح اشوف الاهرمات انا والعائلة ونتصور مع ابو الهول والاهرامات
ايوه اروح اشوف اماكن بلادى السياحية واتمتع ببلدى الجميلة
حضرت نفسى وحضرت الميه والاكل وكل شى تمام وعال العال
وقبل ما انزل دخلت على جوجل ارث وشوفت الطريق الى هشمى فيه ذهاب واعوده وكله تمام
نزلت وخدت العربية وتوكلت على الله
مشيت لغاية ما روحت اخرشارع الهرم واذ فوجئت ان الطريق مبئاش مكمل على طول ذى ما فى الخريطة وفىه داخله تانيه يمين
وناس بتخش عكس وحاجات غريبة بتحصل
لئيت كذا واحد واقفيين عماليين يقولو هرم هرم هرم
قولت اشوف ايه الكلام قوتله اه هرم
قالى تالى يا فندم كده عشان الطريق اتقفل واتغير واحنا تبع الهرم وهندلك على الطريق الصح
متقلقش يا بيه احنا واقفيين ندل الناس على طريقة الدخول
وفضل يتحايل عليا لمدة ربع ساعة مثلا
طبعا انا مصدقتوش وقولت ده اكيد حرامى مثلا او هيثبتنا
قولت سيبك منه وانا هسئل لوحدى
بس بعد ايه مهو دخلنى خلاص فى شارع الظلمات
المهم سئلت اخش ازاى واتارى كل الناس هناك على شاكلته كده عاوزيين يدبسوك فى اى مصلحة وخلاص مش مهم اذا كنت هتتبهدل ولا لا
دخلت شارع طويل فضلت ماشى لغاية ما لقيت بوابة ابو الهول
اول ما دخلت هجموا عليا برده ناس كتيير كله عاوز يركنى
سئلتهم انا شوفت عربيات بتدخل جوه الهرم الكلام ده ازاى انا عاوز اخش جوه
قالى لا يا فندم ده ممنوع ومينفعش ومبيخشش غير السياح
قولتله بس انا شايف عربيات ملاكى عادية ... دلنى بس انت اروح ازاى وانا هروح
قالى لا والله مفيش حد بيخش جوه اركن انت بس هنا وانا هدخلك جوه تتمتع
قولت سيبك منه برده
ركنت
ومش هو قال ايه رايح يقطعلى تذاكر وهنتحاسب يا بيه بعديين
طبعا مخلتوش يدفع وقطعت التذاكر ب 4 جنيه بس
ودخلت
وانا داخل المدام سئلت الظابط لو سمحت ازاى نخش بالعربية جوه
قالها يا مدام انتى دخلتى داخلة غلط المفروض تلفى من عند ميدان الرماية وتخشى من عند ميناهوس هيدخلوكى جوه بالعربية
قولنا طب نرجع
راح الواد الى كان بيشتغلنا ده خرج وبص للظابط كده بصه وقاله لا وليه وفين وازاى ولقيت الظابط خاف منه وقالى الافضل دلوقتى انك تخش من هنا عشان مش هتلحق تلف اصل الهرم هيقفل الساعه 4
سبحان الله لما الشرطة الموجوده عشان تحمينا انا واهلى وكل الناس بتخاف من شوية بلطجية وصيع يبئا لله الامر من قبل ومن بعد
الظابط خايف منهم يبئا ميستهلش البدله الى لبسها اصلا
المهم
دخلت جوه وهو مصمم يركبنى حنطور
وفضل يرخم وفضلت انا كمان ارخم لغاية ما مشى بعد ما اديته خمسه جنيه
فى الاول وفى الاخر كنت خايف على مراتى واولاادى الصغيريين
وجوه ايه بئا يا استاذ
عالم ومولد
ناس عاوزه تبعلك بردى بالعافيه
وناس عاوزه تبعلك اهرامات صغيرة بالعافيه
وناس عاوزه تركبك حنطور بالعافية
دخلنا من حته قدام ابو الهول والاهرامات فوق على مطلع كبير واحنا عاوزيين نطلع فوق
اتارى ايه
ان مفيش غير ده هو المطلع اما تطلع على رجلك او تركب الحنطور
قولت اكيد مش هبهدل مراتى والعيال
ولقيت بتاع الحنطور بيقولى 60 جنيه بس يا بيه
سيبته قالى طب ب 40
سبته قالى طب ب 20
قولت يلا مش مشكلة
ركبنا وطلع بينا فوق
وبعد شوية صغيريين قالى الفة خلصت انا طلعتكم
طب هننزل ازاى ؟؟؟
ربنا معاك
المهم
قولت مش مشكلة نقف بئا نتصور ونستمتع بالصور ووقت الغروب
ولسه بنقول يا هادى
ولقينا بتوع الجمال اتلموا حولينا .... تتصور يا بيه ... تتصور يا استاذ
يا عم ما انا بتصور وانت مالك
طب تتصور مع الجمل
لا ياعم يحرق ام الجمل
طب تركب الجمل
ولا هركبه
طب شكلك غاوى تصوير
يخرب بيت ام الغتاته
شويه ويجى بتاع الحصنة
نفس الكلام تانى
وشوية كده الاطفال عطشت قولت اطلع الميه
وفوجئت انى نسيت الميه فى العربية
طبعا مين سامعنا بتاع الجمل وبتاع الحصان
اصلى نسيت اقولكم انهم متحركوش من جنبنا
بيتفسحوا معانا
راح منادى بتاع الميه
بكام الميه قالى ب 7 جنيه
الازازة الصغيرة ام جنيه ونص
وكمان شكله مليها من الحنفية
ولسة بقوله ليه ديه بره بجنيه ونص
وبحط ايدى فى جيبى اطلع فلوس قولت اديله خمسه جنيه
برفع عينى تانى لئيته سابنى ومشى
ياعالم يا زباله
وهنا ققرننا اننا نرجع فورا نركب العربية ونمشى من المكان الزباله ده
وشيلت الاولاد ونزلنا المنزل على رجلينا
واتهدلنا اخر بهدلة
على الرغم من انك كنت ممكن تخش بالعربية عادى لغاية الهرم من الطريق التانى وتستمتع وتنزل المنزل بالعربية وتروح عادى
والحمد لله بعد البهدله وصلنا تحت وخرجنا من البوابة واحنا طبعا عماليين نشتم ونلعن المكان ده والسياحة والشرطة والناس
وقال ايه كمان الراجل الى مركنى فى الشارع عاوز فلوس
وبصراحة صعب عليا من الى عملته فيه ومن الزعيق والشتايم
وامنت ان الاهرامات لازم تتشال من عجائب الدنيا السبع وكمان تتشال من الوجود مش عشان هيا وحشة عشان فى ناس زبالة مخلينها وحشة
بس قبل ما اروح قولت لازم اشوف الطريق التانى ده
وروحت لفيت من ورا لغاية ما روحت عند المكان التانى
وقفنى ظابط قالى خلاص الميعاد خلص
وحكتله القصه وقالى تعالى من الصبح وامشى فى الطريق ده وبعد ما اعديك اوعى تقف بالعربية لحد لغاية ما تلاقى نفس جوه الهرم
شركة سيادتة الظابط الى برده خايف من الناس الى بتضحك وبتصطاد الناس وتبهدلهم

قبل ما اختم احب اقول ان الاهرمات وابو الهول فى حالة يرثى لها
ابو الهول فى رئيى محتاج الى ترميم وصيانة
مراكب الشمس شكلها من بره ضايع
الاهرامات والخيل والجمال محتاجة تنظيم
الناس الزباله ديه اما تمشى خالص او يعمللولها نقابة وشغل رسمى
يبئا ليهم ذى موحد
ويطلعوا ورا بعض بالدور فى حالة الحاجه انك تروح مكان او تركب حصان او كارته
يتم التعاقد معاهم من قبل شركات سياحية ويبئا الموضوع منظم

الحلول كتيرة سهله بس الى ينفذ
وحتى ذلك الحين انا مش هروح الاهرامات تانى ومش زعلان لو اتشالت من عجائب الدنيا المليووووووووووون

تعالو ناخر ميعاد الساعه

ياريت ناخر ميعادها

  

من كام شهر كده كل يوم وانا نازل الصبح الساعه 6 رايح اركب عربية الشغل

اقابل بعض الناس فى الشارع ميزيدوش عن 4 مثلا

والشارع بيبئا ضلمة والشارع مش واسع اوى يعنى بنعدى جنب بعض عادى ولا سلام ولا كلام

جايز عشان الدنيا بتبئا برد او حتى بتبئا نازل الصبح وانت مش قادر اصلا ونفسك تنام (المهم)

وانا بدور فى الكتب وقعت عنيا على معلومة ان من علامات الساعه ان الناس هابئا ماشية جنب بعض ومحدش هيرمى السلام على التانى وفكرت شوية وقولت مهو ده الى بيحصل فعلان

طب وليه محاولش ااخر ميعاد الساعه طول ما انا عايش على الارض وياه لو غيرى كمان يعمل كده ... ياه لو كل الناس عملت كده اكيد مش هتتحقق العلامة ديه ونحاول ناخر ميعاد الساعه !!!! بس هيا اكيد هتحصل بس ان شاء اللهمش وانا عايش على وجه الارض

وابتديت من اول الشتاء او قبله بشوية طول ما انا ماشى الصبح فى الشارع اقابل الناس ديه اقولهم سلام عليكم

وفضلت على الموضوع ده متواصل لمدة 4 اشهر

تخيل الناس ديه ممكن تكون مش مسلميين اصلا

او حتى مسلميين

لغاية ما انبارح واحد من الناس الى بسلهم عليهم كل يوم هو الى ابتدى وقالى سلام عليكم

فرحت اوى بصراحه انه قالى سلام عليكم وانبسطت ان صبرى جه بنتيجة

المهم برده

النهارده وانا نازل الصبح الدنيا كانت ضلمة كالعاده وكنت خايف من الكلاب الى فى الشارعه يجى كده  12 13 كلب فقولت يا اواد اطلع فوق الرصيف وامشى على جنب

وشوفت الراجل الى بيعدى عليا وانا ماشى وهو كمان ماشى رايح شغله والراجل مشفنييش ومكنش واخد باله منى

نديت عليه بصوت عالى وقولت (سلام عليكم) وكان الراجل كان مستنيها وكان بيدور عليا ورد (وعليكم السلام ورحمة الله وبركاته) ربنا يباركلك يا بنى ويخليك ويفتحها فى وشك

اتهزيت من جوايا اكتر بس فرحت وفرحت اوى كمان وحسيت ان صبرى بيجيب نتايج حلوة

كام واحد فيكم بيقابل ناس فى الشارع ومبيرميش السلام ؟؟؟

افشوا السلام بينكم وياريت نحاول طول ما احنا عايشيين وميجيش اليوم الى نلاقى اتنيين ماشيين جنب بعض وميرموش السلام على بعض

عجة بلدى

اكلة غريبة كده بتتعمل من البيض والفول والبصل والبقدونس وممكن حاجات تانيه منعرفهاش

طبعا الاكلة ديه لما بتتعمل او لو شوفتها قبل كده وجيت تاكلها مش هتعرف فين البيض وطعمه ولا الفول وطعمه ... الخ

هتلائى كله بئا ملغبط على كله وحاجه اى كلام

المهم

كنت سهران امبارح فى الشغل حبيتيين وروحت متاخر

وانا فى الطريق كنا بنتكلم فى العربية على السياسة وحال البلد وكل واحد مننا منتمى لفكرة معينة وكله عمال يخبط فى كله

فققر واحد من اصدقتئنا فض الاشتباك بتشغيل اغنية هادئة لام كلثوم (ودارت الايام)

وبالفعل العربية هديت وكل واحد فينا ابتدى يسمع الاغنية

مع اختلافنا هيا حرام ولا حلاال او صوت ام كلثوم حلو ولا وحش او الاغنية قديمة او عصرية او الكلامات قوية او ركيكة

لكن الكل قعد يسمع الاغنية

وانا اندمجت وركزت مع الاغنية مش مع الكلمات او الغناء او الالحان

لالالا انا ركزت مع الناس الى بتعزف والى مش مصدق الى هقوله ده يسمع الاغنيه ويشوف بنفسه

اولا ابتدت الاغنية بمقطوعة مش قصيرة للعزف بجميع الالاات وبعد كده الناس كلها راحت مسقفة

وبعد كده دخلت ام كلثوم وافتتحت الاغنية فالناس برده سقفت

وبعد اول كوبليه دخل عزف منفرد من عازه الرق لفترة كبيرة ... وبعد كده الناس سقفت

ودخلت ام كثوم تغنى والناس برده سقفت

وبعد كده عزف على البيانو منفرد ... وبعد كده الناس سقفت

ودخلت ام كلثوم غنت تانى ... وبعد كده الناس سقفت

وبعد كده عزف تانى منفرد ... وبرده الناس سقفت

وبعد كده غنت ام كلثوم وختمت ... وبرده الناس سقفت

انا لاحظت هنا عدد التشجيعات من الجمهور ... ولاحظت ايه ؟؟؟ !!

الناس الى بتعزف على الالاات عدد التشجيعات بتعتهم مقلتش كتير عن تشجيعات ام كلثوم

كل واحد متميز فى الة معينة عزف لوحده مده كبيرة والناس شجعته

ام كلثوم غنة والنس شجعتها

العمل فى الاغنية مش ذى العجة بتاعت اليوميين دول ولا انت سامع الكلمات ولا حاسس باللحن ولا حتى العزف انت بتسمع عجة على بعضيها

اما زمان كل واحد كان واخد حقه وكان اسماء العازفيين والملحنيين اشهر من النار على العلم ولا يقلون اهمية عن ام كلثوم نفسها

تقدر تفرق بين كل اله عزف وتقدر كمان تعرف امكانيات وابداع كل الة وتقدر تشوف ابداع الملحن والموزع فى الاغنية

وذى ما قولنا وبكرر تانى كل واحد خد حقه فى الاغنية محدش اتظلم ومحدش لمع اكتر من التانى واسئل اهل زمان عن اشهر الملحنيين والعازفيين معروفين بالاسم

اما دلوقتى حاجه واحد بس الى بنسمعا وكمان بنكلها (العجة)

الذوق مخرجش من مصر

الذوق مخرجش من مصر

نفسى يا مصريين نعرف حاجه مهمة ان العيب مش فى البلد ... الجو هو الجو والنيل هو النيل والاهرامات مصحتش لئيتها فى اسوان

العيب فينا احنا ... احنا الى لوثنا الجو والنيل وممكن نهد الاهرام

الذوق العام اصبح فى انحدار

الاخلاق ضعفت عندنا

البلطجة زادت فينا

وكل ده يخلى الذوق بعد ما مات ممكن يصحى ويخرج من مصر !!!

مش فاهم اقصد ايه ؟؟؟ اقرا القصة الحقيقية ديه الى حصلت معايا

قصة حقيقة من التراث الشعبى لمصر القديمة

فى يوم من الايام فكرت انى انزل ازور شارع المعز انا واصحابى واتفجر على مصر الفاطمية والاماكن الاسلامية الجميلة

وبالفعل نزلت وابتديت الرحلة فى شارع المعز

وكانت البداية من باب الفتوح الذى يقع بين حى باب الشعرية وميدان الجيش

واول ما دخلت من باب الفتوح لئيت جنب الباب ضريح لونه اخضر

ضريح وتحته تربة بتنزللها بسلالم

المهم خدت صورة للضريح للذكرى وقولت ابئا اسئل ايه قصة الضريح ده بعديين

وروحت وابتديت ابحث فى قصة الضريح ده

الضريح ولاحد اسمه حسن الذوق

حسن الذوق ده كان عايش امام باب الفتوح وكان دائما يتصدى لحل المشاكل والخناقات بين الناس

لحد ما فى مرة تعب من كتر البلطجة والفتونة وكثرتها اما باب الفتوح

وكره البلد وقرر انه يرحل عن مصر عشان مفيش فايده فيها وتعب من كتر حل المشاكل الى مبتنتهيش بسبب هذا الشعب

وبالفعل خد بعضه عشان يرحل بره مصر

وهو لسه خارج من باب الفتوح مات سيدى حسن الذوق ودفن فى مكانه بجانب باب الفتوح من الداخل

ومن هنا جاءت المقولة (الذوق مخرجش من مصر) الى اصبحت بتحل مشاكل كتيرة فى الخناقات بين الناس لما يقوم واحد من الناس ويتكلمهم بصوت عالى ويقول يا جماعه ده الذوق مخرجش من مصر كفاية خناق

بس للئسف كان ممكن يخرج ولو كان عايش بينا دلوقتى وشاف الى احنا فيه كان اكيد هيحاول يخرج من بدرى

واكيد نفسه دلوقتى يخرج هو والضريح بتاعه من مصر كلها

ارجوكم كفاية بلطجة وجهل وفتونة وجشع وطمع

ارجوكم سيبوا الذوق فى مكانه جوه مصر ... مش عاوزين الذوق يخرج من مصر

محطات

محـطـات

اكيد ركبت مرة قطار او اتوبيس او ميكروباص او حتى مترو الانفاق

واكيد نزلت مرة على الاقل فى محطة من محطات اى مواصلة

عمرك سئلت نفسك هو ليه فى محطات ؟؟؟

او هو يعنى ايه محطات ؟؟؟

يمكن لو انت معاك عربية مش هتحس بموضوع المحطات ده وهتنساها ذى ما كتير مننا نسيها عشان بسبب العربية مبئاش يقف فى محطات غير كل فين وفين

لما بيضطر بس يخرج بمواصلة

وللمحطات فايدة مهمة للاشخاص وكمان لوسيلة المواصلة نفسها

من التقاط الانفاس والراحة واكتشاف اى عطل للمواصلة المستخدمة وكمان عملية تنظيمية دقيقة للافراد الى بيركبوا المولصلة ديه

اه مفيش نظام حتى فى المحطات ولا حتى راحة وصيانة للمواصلات بس مش مشكلة ... فكرة المحطة فى حد زاتها فكرة تحمل الكثير من المعانى والقيم والانضباط

فكر فيها شوية بعمق

مقدمة طويلة شوية معلش بس الغرض منها مهم فى تثبيت فكرة المحطات

انت كمان لازم يكون عندك محطات فى حياتك تقف عندها وتحاسب نفسك وتشوف ايه الى ناقصك وايه الى حققته

هل حققت السنة ديه حاجه تفيدي نفسك بيها ؟؟؟

هل حققت السنة ديه حاجه تفيد البشر بيها (زمايلك- اهلك- جيرانك) ؟؟؟

ايه الى فاتك كان نفسك تعمله ومعملتوش ؟؟؟

لية الموضوع الفلانى وقع منك ومكملش ومحققتش اهدافك فيه ؟؟؟

ليه بعيد عن اهلك ومبتصلش الرحم ؟؟؟

الاسئله ديه وغيرها كتير من الاسئلة لازم تحصل فى محطات فى حياتك تكون محددها لنفسك

فمثلا بعض الناس يقفون بمحطات كل اول عام

والبعض كل اول شهر

والبعض الاخر يقف فى محطات ويربطها بتواريخ واحداث مهمة

ولو معندكش محطات لنفسك عشان تلتقط فيها الانفاس وتعيد تنظيم نفسك والتفكير فى حياتك وحياة من حولك يبئا انت عايش بلا هدف

للئسف تبئا مش عايش ... وديه غير تعاليم دينا واسلامنا

جميل انك حققت حاجات ... وساعتها متنساش (وما توفيقى الا بالله) دايما تكون ملازماك

وحاجات تانيه جايز متوفقتش تحققها ... لابد من الوقوف حولها (الحمد لله) والبحث فى الاسباب وطرق الحل والنجاح

على الرغم من ان دين الاسلام يحث الانسان على التامل والوقوف على محطات والاجتهاد والعمل الا ان كتير منا بعيد عن الموضوع ده

تعالوا نشوف اوروبا بتعمل ايه وده من كلام احد اصدقائى عاش فى اوروبا

الفرد هناك مثلا يقول فى الشهر الفلانى السنة الفلانية هقوم برحلة الى بلاد الشرق

او مثلا فى الشهر الفلانى السنة بعد بعد القادمه هشترى بيت جديد

ويبدا فى حساب حساباته والعمل عليها بجد واجتهاد الى ان تتحق (بفضل الله اولا ثم اجتهاده ولكنه لا يعلم)

كل ديه محطات بيقف فيها الانسان .... محطات مهمة ... والى معندوش محطات لازم يوجدها لنفسه ويبتدى يتعود عليها

مش عيب انك تكون من فترة كنت بلا هدف او معندكش محطات لنفسك ... لكن العيب انك تستمر فى ده بعد ما عرفت اهميتته

ياترى محطتك الجاية امتى ؟؟ وفين ؟؟ وهتعمل ايه ؟؟