ضيف لحياتك

ذى ما قولتلكم قبل كده انى مليش فى القراءه بس اهه بحاول اعمل حاجه اكيد هتفيد

قريت ان عدد كبير من العظماء المئه الى فى التاريخ كانوا فشله فى الصغر بس من سن 13 سنه او 15 كده ابتدوا يقروا ويقروا كتير خاصا فى الفلسفه والمنطق والرياضيات وغيرها كتير من العلوم

مش بس مجرد تقرا قصه او كتاب !!!

لا الناس ديه كانت بتقرا مراجع وكتب من اصول العلوم على مر التاريخ وهما فى السن الصغير ده

وعرفت اد ايه احنا متاخريين عنهم يعنى انا عندى 28 سنه ولسه هبتدى اقرا وهما كانوا بيقروا فى سن 15 سنه يعنى انا متاخر بحوالى 13 سنه !!!!

لذلك قررت انى اجيب ال 13 سنه فى اقل وقت اقدر عليه

ومستغربتش انى عارف ان اول ما نزل من القران على الرسول الكريم هو (اقرأ) ... يمكن كنت بتسمع الجمله ديه وتعديها عادى ومش فى بالك بس لما عرفت القراءه عملت ايه فى الشخصيات المئه الى قريت عنهم حسيت اكتر بقيمه الكلمه ديه ..

اكيد لما تكون القراءه عامل مشترك بين كل الشخصيات ديه واصبحت الشخصيات ديه ناجحه يبئا اكيد القراءه سبب من هذه الاسباب مش البطاطس مثلا

وعلى الرغم من اننا بنسمع برده ان الغرب اعتمد على علم العرب فى وقت سابق وخده وترجمه وابتدى النهضه منه الى خلته فى القمه الان .. الا اننا برده مش حاسسين بقيمه الجمله ديه

لذلك انا قررت ابتدى فى الفكره التاليه

ببساطه انا هرجع للعلوم بتاعت العرب الى الغرب خدها وترجمها ... وليه لا انى اقراها ده انا مش هبذل فيها مجهود عشان ديه هتبئا بالعربى ... بس ادور على المرجع ده واحاول اجيبه وابتدى اقراه بالعربى ... فاهم يعنى ايه بالعربى ... بدل ما تجيب مرجع انجليزى وانت مش فاهم فيه اى حاجه

ابتديت اجمع كل العلماء المشهوريين فى العرب وهصنفهم حسب كل علم .... وهبتدى اختار اهم 4 او 5 علماء والكتب المهمه بتاعتهم وابتدى اراسل مكتبات اشوف الكتب ديه فين واجيبها واقراها وكمان الخصها لو قدرت

وبالتزامن مع ده الى هياخد شويه وقت .... قولت ابتدى اقرا نوع مختلف من الكتب ... خلينا نخش على الادب الغربى واسلوب جديد فى الكتابه عشان نتعود على الصعب عشان منتصدمش بعد كده من قوه الاساليب الى ممكن نشوفها

ابتديت بشكسبير ... اهه موجود فى المكتبه وشكرا يا تامر باشا

تاجر البندقيه ... ومش عاوز خفه وظرافه ... فاهميين انا اقصد مين طبعا

قصه جميله جدا كل سطر فيها فيه معنى للى يتامل فيه وحابب انى اديكم خلاصه الى مسنى منه ... طبعا هو كله معانى بس ده الى هزنى

تاجر كبير امين ومخلص وصديقه الى دايما بيستلف منه ويعيش حياته وينبسط بالدنيا

عايش التاجر ده عشان يبسط صاحبه وصاحبه كمان ممكن يعمل اى حاجه علشانه

قاله فى مره انا استلفت منك كتير وديونى كترت عندك بس ادامى فرصه انى ارجعلك فلوسك كلها بشرط انك تسلفنى تانى يا اما ارجع بكل الفلوس يا اما احافظ على الفلوس الجديده وارجعهالك

قاله بس يا صديقى انا كل فلوسى فى التجاره بره وكلها فى السفن بتاعتى الى راحه اكتر من بلد

طب والعمل ؟؟؟؟

تعالى ننزل البندقيه ونشوف التجار هناك نحاول نقترض فلوس عشان خطرك وانا اضمنك عندهم بسمعتى وانشاء الله ربنا يوفقك فى مهمتك

راحوا البندقيه ومكنش قدامهم غير تاجر يهودى كان التاجر ده بيقرض الناس بالربا الى كان بيعمل عكسه التاجر الطيب والى كان بيساعد الناس فى اى ضيقه عندهم وده الى كان بيكرهه التاجر اليهودى

فرصه دلوقتى التاجر اليهودى انه يذل التاجر الطيب ويحسسه انه ولا حاجه وده الى كان يعرفه التاجر الطيب وهيستحمله عشان خاطر صحبه

وبالفعل قعد يذل فيهم كتير لغايه لما الداهيه اليهودى قاله طيب انا عشان اثبت حسن نيتى هسلفك من غير فوايد وكمان مش عاوز منك اى ضمانات كل ما هونالك بس اننا هنعمل صك اتفاق بيقول مضمونه ان لو مرجعتش الفلوس فى الميعاد المحدد هاخد بداله رطل من لحم جسمك وليكن بجانب قلبك ... هههههههههههههههه

رفض صاحبه هذا العرض ولكن التاجر الطيب موافق على اساس ان بضاعته هيكسب فيها وهيرد الدين انشاء الله

وسافر صحبه وجه وقت سداد الدين وللئسف كل سفن التاجر الطيب ادمرت وكده كان لابد من سداد الدين حسب الصك المكتوب

وكانت البندقيه تشتهر بالعدل فى القوانيين على الاجنبى وابن البلد على حد سؤاء عشان كده اشتهرت بالتجاره فى ذلك العصر وكانت من اهم المدن

وعرف التاجر الطيب انه عند تطبيق القانون فهو ميت ميت فبعث لصاحبه برساله كانت مضمونها

(عزيزى قد تحطمت سفنى جميعا وغلبت القسوه على دائنى وتدهورت احوالى ... وقد حل اجل الوفاء بدينى لليهودى ولم اوف به .. وحيث انى لا محاله  ميت متى نفذت شروط العقد فانى اعفيك من كافه ديونك لى شرط ان اراك قبل موتى . ومع ذلك فانى لا الح . فان لم يكن فى حبك لى حافز كاف على المجى فلا تجعل رسالتى حافزا عليه)

اسرع صديقه ليراه قبل تفيذ الحكم وقد فتح الله عليه بمبالغ ضخمه لكى يسد ديونه

ولكن رفض اليهودى اخذ المبلغ واراد تطبيق نص الصك وعدم السماح ابدا وكان ذلك لحقد داخله ... حتى ولو ذادوا قيمه المبلغ لخمسين ضعف

وتمسك اليهودى بالقانون وان البلد ستفقد مصاقيتها اذا لم يطبق القانون وستنهار البندقيه كلها ولا مفر من تطبيق القانون بحذفيره

وهنا ظهر فقيه قانونى وتدخل ليقراء الصك

فقال نعم من حق اليهودى تنفيذ الحكم هذا صحيح

ولكن النص يقول رطل من اللحم لا يزيد او ينقص فاذا زاد اليهودى فى التقطيع يحبس وتتم محاكمته

وايضا لا يتضمن النص الدم !!! اى لا تسقط نقطه دم واحده اثناء التقطيع  والا عوقبت وتتم محاكمتك

هذا هو القانون الذى تتمسك به

هنا تراجع اليهودى وطلب ان ياخد اضعاف المبلغ كما عرضوا له من قبل

وهنا تدخل الفقيه وقال بل اصل المبلغ فقط الذى ينص عليه الصك

وبعد ذلك قال الفقيه هذا اولا اما ثانيا فتقول قوانيين البندقيه ان من حاول ايذاء انسان بقصد تطبق عليه عقوبات شديده تصل الى الاعدام

وتم الافراج عن التاجر الطيب واكمل حياته بجانب صاحبه واصبح تاجرا قويا مره اخرى

........................................................................................

........................................................................................

........................................................................................

1-   لا معنى اسمى من معنى الصداقه الحقيقيه (حافظ على صديقك)

2-   العدل اساس الملك (لولاا العدل ما كانت البندقيه والتجاره فيها )

3-   لا تتوقع ان اى قانون مها ان كان من الممكن ان يحميك او يضر غيرك وان هناك ما يسمى بقدره الله والعنايه الالهيه من دونها لفسدت الحياة

4-   الرحمه (ورحمتى وسعت كل شى) خليك رحيم مع الى حوليك ونقى قلبك دائما من الحقد والشر والغضب (التمس لااخيك سبعيين عذرا)

5-   الربا حرام فى جميع الديانات (سبحان الله)

6-   "اقرا بسم ربك الذى خلق"

شكرا