الذوق مخرجش من مصر

الذوق مخرجش من مصر

نفسى يا مصريين نعرف حاجه مهمة ان العيب مش فى البلد ... الجو هو الجو والنيل هو النيل والاهرامات مصحتش لئيتها فى اسوان

العيب فينا احنا ... احنا الى لوثنا الجو والنيل وممكن نهد الاهرام

الذوق العام اصبح فى انحدار

الاخلاق ضعفت عندنا

البلطجة زادت فينا

وكل ده يخلى الذوق بعد ما مات ممكن يصحى ويخرج من مصر !!!

مش فاهم اقصد ايه ؟؟؟ اقرا القصة الحقيقية ديه الى حصلت معايا

قصة حقيقة من التراث الشعبى لمصر القديمة

فى يوم من الايام فكرت انى انزل ازور شارع المعز انا واصحابى واتفجر على مصر الفاطمية والاماكن الاسلامية الجميلة

وبالفعل نزلت وابتديت الرحلة فى شارع المعز

وكانت البداية من باب الفتوح الذى يقع بين حى باب الشعرية وميدان الجيش

واول ما دخلت من باب الفتوح لئيت جنب الباب ضريح لونه اخضر

ضريح وتحته تربة بتنزللها بسلالم

المهم خدت صورة للضريح للذكرى وقولت ابئا اسئل ايه قصة الضريح ده بعديين

وروحت وابتديت ابحث فى قصة الضريح ده

الضريح ولاحد اسمه حسن الذوق

حسن الذوق ده كان عايش امام باب الفتوح وكان دائما يتصدى لحل المشاكل والخناقات بين الناس

لحد ما فى مرة تعب من كتر البلطجة والفتونة وكثرتها اما باب الفتوح

وكره البلد وقرر انه يرحل عن مصر عشان مفيش فايده فيها وتعب من كتر حل المشاكل الى مبتنتهيش بسبب هذا الشعب

وبالفعل خد بعضه عشان يرحل بره مصر

وهو لسه خارج من باب الفتوح مات سيدى حسن الذوق ودفن فى مكانه بجانب باب الفتوح من الداخل

ومن هنا جاءت المقولة (الذوق مخرجش من مصر) الى اصبحت بتحل مشاكل كتيرة فى الخناقات بين الناس لما يقوم واحد من الناس ويتكلمهم بصوت عالى ويقول يا جماعه ده الذوق مخرجش من مصر كفاية خناق

بس للئسف كان ممكن يخرج ولو كان عايش بينا دلوقتى وشاف الى احنا فيه كان اكيد هيحاول يخرج من بدرى

واكيد نفسه دلوقتى يخرج هو والضريح بتاعه من مصر كلها

ارجوكم كفاية بلطجة وجهل وفتونة وجشع وطمع

ارجوكم سيبوا الذوق فى مكانه جوه مصر ... مش عاوزين الذوق يخرج من مصر

محطات

محـطـات

اكيد ركبت مرة قطار او اتوبيس او ميكروباص او حتى مترو الانفاق

واكيد نزلت مرة على الاقل فى محطة من محطات اى مواصلة

عمرك سئلت نفسك هو ليه فى محطات ؟؟؟

او هو يعنى ايه محطات ؟؟؟

يمكن لو انت معاك عربية مش هتحس بموضوع المحطات ده وهتنساها ذى ما كتير مننا نسيها عشان بسبب العربية مبئاش يقف فى محطات غير كل فين وفين

لما بيضطر بس يخرج بمواصلة

وللمحطات فايدة مهمة للاشخاص وكمان لوسيلة المواصلة نفسها

من التقاط الانفاس والراحة واكتشاف اى عطل للمواصلة المستخدمة وكمان عملية تنظيمية دقيقة للافراد الى بيركبوا المولصلة ديه

اه مفيش نظام حتى فى المحطات ولا حتى راحة وصيانة للمواصلات بس مش مشكلة ... فكرة المحطة فى حد زاتها فكرة تحمل الكثير من المعانى والقيم والانضباط

فكر فيها شوية بعمق

مقدمة طويلة شوية معلش بس الغرض منها مهم فى تثبيت فكرة المحطات

انت كمان لازم يكون عندك محطات فى حياتك تقف عندها وتحاسب نفسك وتشوف ايه الى ناقصك وايه الى حققته

هل حققت السنة ديه حاجه تفيدي نفسك بيها ؟؟؟

هل حققت السنة ديه حاجه تفيد البشر بيها (زمايلك- اهلك- جيرانك) ؟؟؟

ايه الى فاتك كان نفسك تعمله ومعملتوش ؟؟؟

لية الموضوع الفلانى وقع منك ومكملش ومحققتش اهدافك فيه ؟؟؟

ليه بعيد عن اهلك ومبتصلش الرحم ؟؟؟

الاسئله ديه وغيرها كتير من الاسئلة لازم تحصل فى محطات فى حياتك تكون محددها لنفسك

فمثلا بعض الناس يقفون بمحطات كل اول عام

والبعض كل اول شهر

والبعض الاخر يقف فى محطات ويربطها بتواريخ واحداث مهمة

ولو معندكش محطات لنفسك عشان تلتقط فيها الانفاس وتعيد تنظيم نفسك والتفكير فى حياتك وحياة من حولك يبئا انت عايش بلا هدف

للئسف تبئا مش عايش ... وديه غير تعاليم دينا واسلامنا

جميل انك حققت حاجات ... وساعتها متنساش (وما توفيقى الا بالله) دايما تكون ملازماك

وحاجات تانيه جايز متوفقتش تحققها ... لابد من الوقوف حولها (الحمد لله) والبحث فى الاسباب وطرق الحل والنجاح

على الرغم من ان دين الاسلام يحث الانسان على التامل والوقوف على محطات والاجتهاد والعمل الا ان كتير منا بعيد عن الموضوع ده

تعالوا نشوف اوروبا بتعمل ايه وده من كلام احد اصدقائى عاش فى اوروبا

الفرد هناك مثلا يقول فى الشهر الفلانى السنة الفلانية هقوم برحلة الى بلاد الشرق

او مثلا فى الشهر الفلانى السنة بعد بعد القادمه هشترى بيت جديد

ويبدا فى حساب حساباته والعمل عليها بجد واجتهاد الى ان تتحق (بفضل الله اولا ثم اجتهاده ولكنه لا يعلم)

كل ديه محطات بيقف فيها الانسان .... محطات مهمة ... والى معندوش محطات لازم يوجدها لنفسه ويبتدى يتعود عليها

مش عيب انك تكون من فترة كنت بلا هدف او معندكش محطات لنفسك ... لكن العيب انك تستمر فى ده بعد ما عرفت اهميتته

ياترى محطتك الجاية امتى ؟؟ وفين ؟؟ وهتعمل ايه ؟؟

كلام ستات

كلام ستات

نفسى من زمان بصراحة انى اقعد مع ستات واتكلم معاهم بحرية واشوف ايه الفرق بين قعدت كلام الستات وقعدت كلام الرجاله

وعشان كده جبت 8 ستات جمبى وقولت اتكلم معاهم واناقشهم واشجعهم او انقضهم بكلام موجود فى قلبى نفسى اطلعه واعبر عنه

واحترت فى البداية اختار ال 8 ستات ازاى ؟؟

وقعدت افكر كتير لغاية لما جمعت اغلب انواع الستات جمبى عشان يمثلوا اهم انواع الستات فى الزمن الى عايشينه وفى ازمنة فاتت كمان

احب اعرفكم الاول باسميهم

تركيا

شبه الجزيرة العربية

المغرب العربى

اليونان

مصر

افريقيا

ومن بلاد الغرب 3 مع بعض هما فرنسا وانجلترا وامريكا

الصين واليابان

وبصراحه كلهم احلى من بعض والواحد متشوق للكلام معاهم وابتديت مع تركيا وسئلتها واتكلمت معاها

يا ست تركيا ليه بس خالعه توبك وبتحاولى تلبسى لبس مش مقاسك وتسريحة شعر مش تسريحتك ؟

ليه على الرغم من ان 95 % منك اسلاميين وبرده بتقولى انا علمانية ؟؟

اغلب مساحتك فى اسيا وبرده عاوزه تروحى ضمن اوروبا ؟؟؟

ده انتى امك الدولة العثمانية الى فضلت عايشة 6 قرون بحالهم

وبرده عاوزه تبئى مش مننا ده انتى اكبر واقوى خلافة للاسلام من اقصى المغرب الى اوربا

روحتى ليه للغرب وسيبتى بيتك يا ست انتى ؟؟؟

لغاية لما بقيتى فى الشارع بلا هوية محددة لا انتى اسلامية ولا كمان اوروبية

ارجوكى ارجعى تانى لسه الامل فيكى

وجه الدور على الست التانية الى قاعدة جمبها شبه الجزيرة العربية

انتى يا ستى ليه خدعتى وادخدعتى ومشيتى ورا حلم زائف

مشيتى ورا بريطنيا عشان مجد شخصى زائف وبرده محققتيهوش

عارفه ليه عشان بعدتى عن الاسم الحق الى هو اصله منك

تعرفى ابنك الشريف حسين الى وقف وتحالف مع بريطانيا ضد اهله وناسه من الخلافة العثمانية

عشان يستحوز على مجد شخصى وتكونى ليه وبس وملوش دعوه ببقيت الخلافة العثمانية

لدرجة انه حارب الدولة العثمانية مع بريطانيا وبرده خد على قفاه ومدولوش حاجه

شوفتى لما بعتدى عن الاسلام وطلبتى العزة بغير الاسلام حصل ايه فيكى

وفضلتى مستعمرة من زمان وحتى الان ببترولك الى متقدريش تمنعى تصديره عن دول الغرب

ومثال على كده عندك بنتك الكويت الى تقريبا هيا مستعمرة امريكية

وغيرها من بناتك وقرايبك الى جمبك

فوقى انتى كبيرة واطلبى العزة بالاسلام هتنجحى ودورى على قرايبك ولميهم معاكى وكونى دولة خلافة اسلامية جديده

اما انتى ياست رقم 3 بلاد المغرب العربى

بصراحة كده انا معجب بيكى لما عشت فيكى يجى شهر كده

اعجبت اكتر من اعجابى بدول الشرق

واعجبت اكتر لما قريت عنك وعن قوتك واصرارك على ضد الاستعمار من ايطاليا لفرنسا لانجلترا

اعجبت بكفاحك واصرارك وكمان من فتوحاتك ودورك فى الاندلس

لسة فيكى تحدى وتحدى كبير كمان

ليه كلنا ناسينك وممكن تكونى انتى محور الدنيا الفترة القادمه

التعاون معاكى اكيد كويس .. والتضامن معاكى ممكن يرجع الاخلافة من ناحية الغرب مش لازم الشرق

شدى حيلك ومش هنسيبك وان شاء الله الامل فيكى

مالك يا ست رقم 4 قاعدة زعلانة ليه ... اه انتى يا يونان

معلش عارف انك مغلوبة على امرك

وانك دمية واداة فى ايد اوروبا

يرموكى فى حروب ويسبوكى تتكلى عشان اهدافهم

يشغلوا العالم بيكى بازمات اقتصادية هيا من افتعالهم

بيلعبوا بيكى الكورة ذى ما هما عاوزيين على الرغم من انك من اول الحضارات الى عرفها العالم

فين ايام علمائك وقوادك العظام ارسطوا ارشميسدس سقراط والاسكندر وافلاطون وغيرهم

الى علموا العالم كله

متبئيش مستكينة وغلبانة وحالولى تكونى نفسك ومحدش يتحكم فيكى انتى مش قليلة والله

اما انتى ... انتى يا امى يا ست رقم 5 مصر

تعبانة وغلبانة طول عمرك

عايشة فوق السطوح بتحاولى تربى عيالك على قد ما تقدرى

وتعبتى من كتر الخلفة والسرقة والرجاله المستغليين الى سرقوكى وخدو خيرك

بموقعك ونيلك وجوك تملكى العالم كله

وبزراعتك الى اهملناها تاكلى العالم كله

وحبك وحنانك واصولك العريقة تضمى الشعب العربى كله من حوليكى

ولادك مش ناسينك وهياحولى معاكى ويودوكى لاحسن الدكاترة ويدوكى احلى علاج ان شاء الله

لغاية لما تقفى تانى على رجللك وتستعيدى عفيتك من رجالة على مر العصور سرقوكى واضعفوكى

متقلقيش ولادك جمبك ومش هيسبوكى يا امى

عندنا امل فيكى وبيكى نقود الامة الاسلامية ان شاء الله

مالك يا سمرة يا حلويه يا ست رقم 6 يا افريقيا

عارف سايبينك وهاملينك خالص

يمكن عشان لونك ... معلش مبيفهموش فى السمار

فكى خير كتير والغبى الى يدور وشه عنك

صحبى زارك قبل كده وشاف فيكى خير وجمال كتير .. بس محدش بيستغله

عارف اننا اغبيا عشان بعيد عنك وغيرنا بيقرب منك وبيستحوذ عليكى عشان مخططاته الصهيونية

هقول لامى وخالتى وقرايبنا الى جنبيا على اهميتك وانشاء الله اجيبهم ونجيلك نستثمر فيكى

امى دلوقتى بئت احسن وجيالك تساعدتك وتستفاد هيا كمان

ربنا معانا

اما انتى .. انتى يا شقرة يام عيون زرق يا رقم 7 اوروبا وامريكا

متفتكريش ان بجمالك الزائف ده تقدرى تسحرى العالم اكتر من كده

عارف ان طمعك كبير .. وتخطيتك ملوش نهاية ... وماسونيتك واضحة فيكى

فضلتى تنخورى وتلفى ذى الافعى لغاية لما وقعتى الخلافة الاسلامية وكمان عاوزه تهدى الاسلام نهائى

احب اقولك اننا عارفين ده وصاحيين وهناخد حزرنا يمكن كنا تعبانيين ونايميين من فترة كده

بس توقعى الصحوة فى اى وقت

ومش هتبئا صحوة عادية هتبئا بنهايتك ... عشان احنا الصح والصح دايما على حق وانتى عارفه كده كويس

مهها حاولتى تخبى انتى عارفه ان هيجى يوم ونفوز وانتى تبئى فى الارض مهها حاولتى تاخرى اليوم ده

بنشر الجهل والفقر فينا

الى ان اليوم ده هيجى بالايمان القوى والاصرار والتحدى من ابناء المسلميين المؤمنيين

واخيرا انتى يا رقم 8 اليابان والصين وشرق اسيا

انتى مثلى الاعلى فى التقدم والصناعة

والانضباط والعمل المنظم

ونفسى امى تتعلم منك وازاى رغم كانت ضروفك صعبة بعد ضربك الجامد

الا انك رجعتى واستحوزتى على العالم كله بصناعتك وتقدمك وانضباطك

وده هو الاستعمار بنوعه الجديد

الى بحييكى عليه .. الى ان اصبحتى من اهم الدول العظمى

ده حتى الرياضة تقدمتى فيها بصورة بشعة وبئيتى بتنافسى درتك امريكا على عدد المدليات

تحية ليكى من كل قلبى ونفسى امى تبئا ذيك بس نعمل ايه محدش بيختار امه

كان حوار جميل مه الستات استمتعت بيه وياترى انت كمان استمتعت ؟؟؟

ما احلى كلام الستات بس ستات خيالى انا مش ستات الواقع

سعد زغلول قا ل ايه ؟؟؟

سعد زغلول قا ل ايه ؟؟؟

مش بحب اليأس ومش هقول مفيش فايده  بس بصراحه حاجه تخلى الواحد متاكد ان الشعب ده مش من السهل يتغير بس برده هحاول طول ما ربنا ادانى نفس

من اسبوع كده لما خدت الاجازة قولت يا واد نروح نتفسح جاتلى كده كام دعوه مجانا لدريم بارك ... قولت تمام يلا بينا نروح

خدت العربية ونزلت الصبح وانا لسة بلف من غمرة واحد بتاع كوتش ندهلى يا باشا العجل نايم .... قولت يا واد مش مشكلة اقف زوده واتاكد على العجل انت برده المشوار بعيد

المهم وقفت زوده وقالى انت مش حاسس بتقل فى الدريكسيون قولتله لا قالى ثوانى اكشفلك على الكوتش شكله كده مخروم ... وفعلان كشف عليه لئا فيه خرميين قالى شوفت ثوانى اعملهملك ... قولتله لا شكرا ... ليه بس يا باشا ده مش هياخدو وقت خوابير ... قولته لا ابوس ايدك بلاش الخوابير سيبها انا هصحلها بعديين

فسئلنى انت رايح مشوار بعيد قولتله لا انا مروح هنا قريب

وخدت بعضى ورحت على اكتوبر وقولت يعنى مش هيلحق يحصل حاجة

والحمد لله ربنا ستر وروحت ورجعت بالسلامة .... وركنت العربية

جاى ابص عليها من كام يوم كده لقيت الفاردة نايمة على الارض خالص وكمان الاستبن نايم اصلى نسيت اقولكم ان واحد ابن حلاال برده بوظلى الاستبن بالخوابير والعربية لسة جديدة حسبى الله ونعم الوكيل مش مسامحه

قولت افك العجلة النايمه واخدها لبتاع الكوتش الى جمب البيت صحبى يعملها ويظبطها

وكان السؤال الى سئلهولى صحبى ؟؟؟؟؟؟؟؟؟؟؟؟؟؟؟؟؟؟؟؟

هو انت روحت بنزينة زودت الكاوتش قريب يا محمد اوعى تقولى البنزينة الى فى اخر الشارع ؟؟؟ !!!! اه ده الراجل الى عملى الخوابير فى الفرده الاولى زمان....طبعا مرضتش اقوله على الى حصل عند بتاع الكاوتش التانى فقولتله اه ... قالى البيه عاملك خورميين وهو بيكشفلك على الكاوتش

اتارى الاستاذ الى نده عليا ده خرملى العجلة وهو عامل انه بينفخها عشان اصلحها عنده واديله 15 او 20 جنيه مع انه لو كان قالى كنت ادتهومله من باب التكافل او حتى صدقه بس مكنش بوظ الكوتش الجديد ... او ياخد حاجه مش من حقه ليه ... اكيد ربنا مش هيكرمه ابدا

المهم عمل الفردة وقولت ابئا اصلح القديمة بتاع الخوابير بعديين

وفضلت واقف افكر ليه حدد ممكن يعمل كده يبوظلك حاجتك السليمة ومتصعبش عليه وياخد فلوس حرام فى حرام 

الموضوع ده فكرنى بمقالة اكل العيش وفكرنى برده بجشع وطمع الشعب المصرى الى اتعود على الفهلوة والسرقة

المهم

راح صاحبى ده قالى 

واحمد ربنا ده على الاقل بيعمل اربع اخرام ...!!!!

نسيت اقولكم حاجة ...... الفردة القديمة كان فيها اربع اخرام

عندك حق يا سعد بيه فعلان مفيش فايده

اكل العيش

اكل العيش

كل يوم اصحى اروح الشغل الساعه 6 الصبح كده ببئا فرحان انى هنزل وهشم هوا نضيف ... احلى هوا ممكن تشمه قبل التلوث هو الهوا بتاع الساعه 6 والناس كلها نايمين

وياريت الفرحه تتم ... مفيش دقايق واطلع على الشارع بره والائى ميكروباصات واتوبيسات حالتها سيئة جدا وبتطلع دخان اسود ومش اى اسود ده اسود هباب ده طبعا غير ريحته الجنان

وياريت ده اتوبيس او ميكروباص واحد دول كتير ومش بس كده تشوف سواقة غريبة من الناس فى الشوارع خاصا من بتوع الميكروباصات

وبرده تلائى زحمة فى رمسيس او غمرة ... يا اخونا ده احنا 6 الصبح الزحمه ليه بس ؟؟؟

نسيت اقولك اصل بتاع الميكروباص او الاتوبيس راكن على منزل الكوبرى عشان يحمل او راكن فى نص الشارع واهم حاجه يحمل وتتحرق الناس من وراه

كل ده بيخلينى متنرفز وانا رايح الشغل .. لما الساعه 6 الصبح والدنيا كده امال فى الظهر بيحصل ايه ؟؟ اكيد اسؤاء

الموضوع ده خلانى نفسى اعرف بتاع الميكروباص ليه (بيسيب العربية تطلع عادم اسود – ليه بيقف فى نص الشارع – ليه بيسوق واكن فى حد بيطارده وعمال يزنق ويخبط فى خلق الله)

وبالفعل ركبت مع سواق ميكروباص من اول الخط لااخره وقعدت جنبه وفتحت معاه الحوار وكانت الاجابات كالاتى

ليه بتسيب العربية لغاية لما تطلع هباب اسود ؟؟

اولا هيا بتطلع الهباب ده عشان انا بشغلها 24 ساعه كل يوم عشان يا بيه العربية عليها اقساط وعاوز اسد الاقساط

طيب يا باشا مهى الاقساط اكيد خلصت واكيد انت ماشاء الله بتكسب ليه مبتعملش صيانة عشان تحافظ على الجو وبقيت الناس ميجلهاش امراض ده الهباب ده خطير لما كلنا بنشمه

يا بيه مهو انا عندى التزامات تانية والدخل مش بيكفينى

ليه يا باشا بصراحه كده الدخل تقريبا كام ؟؟ ولا تيجنى نحسبها حسبة بسيطة ... الدورة بتعمل نص ساعه يبئا 48 دورة فى اليوم قول يا عم 40 بس وبتلم فى الدورة 28 جنيه

خلاص يا بيه انا قولك واريحك حوالى كده 4000 جنيه او اكتر شوية فى الشهر ... (محلوظة احسبها بنفسك هتلائيها اكتر بكتير – معلش اصل كمان فى فلوس بتاعت الكيف هو نسى يقولهالى بس باين من شكله)

(طبعا ده ولا فى موقف ولا يحزنون يجى لرمسيس ويلف ويقف فى نص الشارع يحمل ويطلع الدورة تانى)

بس مبيكفوش يا بيه ولو معلمتش كده مش هجيب المبلغ ده ... فلازم امشى بسرعه عشان الدورة تخلص واطلع غيرها واقف فى اى حته المهم الزبون يركب اصل الزبون ده بالنسبة ليا جنيه واقف على الارض (الجملة ديه اتقالت بالنص) ولو بئا قعدت اصرف على العربية مش هخلص اسهلى اجيب غيرها احسن ما اصرف عليها

طب والناس كده طظ فيها

اعمل ايه يا بيه ما اكل العيش كده

طبعا فى جزء من الموضوع ده بسبب الجشع والطمع وفى جزء بسبب الخوف على اكل العيش وانا هنا عاوز ابص على اكل العيش بالتحديد لانه هو الحل لكل شى

الموضوع ده بيفكرنى بالظبط ذى واحد غنى وواحد فقير الاتنيين راحوا فرح اوبن بوفيه

تشوف الغنى واخد طبق صغير وماسك السكينة تحس انه قرفان ياكل وبياكل من طراطيف الشوكة – والفقير داخل يزاحم وسط الناس ومعاه 4 اطباق وعمال ياخد من هنا ومن هنا وممكن كمان ياخدهم معاه وهو مروح

وده عشان الغنى عارف انه لما هيروح ممكن ياكل مرة واتنين وتلاته الى نفسه فيه .... اما الفقير ؟؟؟ !!!!

يبئا عشان متشوفش المناظر ديه ومتشمش الروايح ديه ومتلائيش الدنيا زحمه بدون سبب

لازم الشعب ياكل ويشرب ... ده حقه الاساسى مش احلامه او رفهياته ... ده حقه الى فى دول كتير بتوفره شى اساسى من حقوق المواطن

حق الاكل والشرب وعيشة كريمة

امن الناس على اكلهم وشربهم وخليهم ميخفوش من عدم وجوده بتوفيره ليهم كحق اساسى وساعتها ساعتها بس لما ميبئاش خايف ومتسارع على الاكل والشرب هتشوف انه يبتدى دماغه تدور على حاجات تانيه كتيرة وجديدة تفيده وتفيد المجتمع

اكل الناس وشربهم الاول وبعد كده علمهم (علمهم الاخلاق والدين ورسخ عندهم مبادى عدم الجشع والطمع وغيره من القيم والتعاليم الدينية الجميلة)

بس الاول الاكل والشرب ... تصدق فى ناس بتغير دينها عشان الاكل والشرب

ناس مش فارق معاها فلوس ولا تحس بقيمتها اهم حاجه تاكل وتشرب

وهيا ديه بداية الهرم .... وفر الاكل والشرب الى هو حقك مش فضل او منحة وبعد كده كله هيجى بدوره